सियारी, रुपन्देही –
सियारी गाउँपालिकाद्वारा सञ्चालित गाउँपालिका स्तरीय आधारभूत तह कक्षा ८ र कक्षा ५ को परीक्षामा सियारी–६, बर्दहवा स्थित दुर्गा देवी माध्यमिक विद्यालयले उत्कृष्ट नतिजा हासिल गर्दै सियारी गाउँपालिकाको सामुदायिक विद्यालय तर्फ उत्कृष्ट हुन सफल भएका छन्।

कक्षा ८ को परीक्षामा सपना आचार्यले ३.७९ GPA प्राप्त गर्दै सामुदायिक विद्यालयतर्फ प्रथम स्थान हासिल गरिन्। सपनाले यति उच्च GPA प्राप्त गरेर गाउँपालिका स्तरीय शिक्षा प्रणालीमा आफ्नो क्षमताको प्रमाण दिएकी छन्। उनी निरन्तर मेहेनती, अनुशासित र लक्ष्यप्रति प्रतिबद्ध विद्यार्थीको रूपमा चिनिन्छिन्। यसै गरी सोही कक्षाकी सलिना गुरुङले ३.६९ GPA ल्याएर दोस्रो स्थान प्राप्त गरिन्।

कक्षा ५ मा पनि दुर्गा देवी माविको शैक्षिक वर्चस्व

कक्षा ५ को गाउँपालिका स्तरीय परीक्षामा पनि दुर्गा देवी माध्यमिक विद्यालयका विद्यार्थीहरूले प्रथम, द्वितीय र तृतीय स्थान हासिल गर्दै पुनः विद्यालयको शैक्षिक नेतृत्व क्षमता प्रमाणित गरेका छन्।

• 🥇 सृष्टी अर्याल – ३.८६ GPA सहित गाउँपालिका प्रथम
• 🥈 महेश गुरुङ – ३.७४ GPA सहित गाउँपालिका द्वितीय
• 🥉 करुणा खनाल – ३.६८ GPA सहित गाउँपालिका तृतीय

विद्यालय र अभिभावकहरूमा हर्षोल्लास

विद्यार्थीको सफलताको उच्च मुल्यांकन गर्दै विद्यालयले शुक्रबार एक कार्यक्रमका विच सम्मान कार्यक्रम समेत आयोजना गरेको थियो । कार्वियक्रममा बोल्दै वि.व्य.स. अध्यक्ष खेमराज गुरुङले यो सफलता समग्र सियारी गाउँपालिकाको सामुदायिक शिक्षाको सफलतासँग पनि गाँसिएको बताउनुभयो। यी विद्यार्थीहरू भविष्यका लागि प्रेरणाको स्रोत बन्ने निश्चित छ। विद्यालयले आगामी वर्षहरूमा अझ प्रगतिशील योजना सहित शैक्षिक गुणस्तरमा नवीन सुधार ल्याउने प्रतिबद्धता समेत अध्यक्ष गुरुङले गर्नुभयो।

उल्लेखनीय शैक्षिक सफलतापछि विद्यालय प्रशासन, शिक्षकगण, विद्यार्थीहरू तथा अभिभावकहरूबीच उत्साह र गर्वको माहोल छाएको छ। विद्यालयका प्रधानाध्यापक मनिषा पौडेलले यो सफलता विद्यालयको समर्पित शिक्षक टिम, विद्यार्थीहरूको कठिन परिश्रम र अभिभावकको निरन्तर साथको परिणाम भएको बताउनुभयो।

उहाँले भन्नुभयो, “हामी निरन्तर गुणस्तरीय शिक्षा दिन प्रतिबद्ध छौं। यस्ता नतिजाहरूले हाम्रो आत्मविश्वास अझ बलियो बनाएको छ।” विद्यालय व्यवस्थापन समितिले समेत विद्यार्थीहरूलाई बधाई दिँदै आगामी दिनमा थप स्रोत, प्रविधि र तालिममार्फत शैक्षिक सुधारको प्रतिबद्धता जनाएका छन्।